Սկսած 2005թվ-ից Հասարակայնության հետ կապերի հայաստանյան ասոցիացիան և ՄԱԿ-ի մանկական հիմնադրամը  համատեղ  իրականացրել են   բազմաթիվ ծրագրեր, որոնք ուղղված են եղել երեխայի հիմնահարցերի վերաբերյալ ինչպես հասարակության առանձին  խմբերի, այնպես էլ հենց իրենց`երեխաների իրազեկվածության մակարդակը բարձրացնելուն: Բազմիցս կազմակերպվել են հանդիպումներ և սեմինար-քննարկումներ` տպագիր մամուլի, էլեկտրոնային, հեռուստալրագրողների համար, և ստացվել են դրական արձագանքներ և նոր մտահղացումներ: 

2008թվ-ին,  հիմնվելով նախորդ տարիների փորձի վրա, ՄԱԿ-ի մանկական հիմնադրամը  և Հասարակայնության հետ կապերի հայաստանյան ասոցիացիան շարունակում են ակտիվ համագործակցությունը և իրականացնում «Երեխաների իրավունքները նորովի»  կրթական և հանրային իրազեկման արշավ: Ծրագիրը նախատեսված է հայաստանյան ԶԼՄ ներկայացուցիչների և հանրակրթական դպրոցների ուսուցիչների համար: 

Այն ունի երկու բաղադրիչ` 

•   «Երեխաների խնդիրների վերաբերյալ լավագույն լրագրողական նյութ» թեմայով մրցույթ`ԶԼՄ ներկայացուցիչների համար և
•    Երեխաների իրավունքներին նվիրված դասաժամի սցենարների մրցույթ` հանրակրթական դպրոցի ուսուցիչների համար: 

Առաջին անգամ ուսուցիչների ներգրավումը ծրագրին պայմանավորված է այն հսկայական դերով, որ ունեն նրանք երեխաների կրթության, դաստիարակության և իրենց իրավունքների մասին իրազեկվածության բարձրացման գործում: 

 Արշավի հիմնական նպատակներն են` 

• Նպաստել երեխաների դերի բարձրացմանը հասարակական կյանքի տարբեր ոլորտներում  
• ԶԼՄ-ների միջոցով (հեռուստատեսություն, ինտերնետ, տպագրություն, ռադիո)  բարձրացնել հանրային իրազեկվածության աստիճանը երեխաների հիմնախնդիրների վերաբերյալ 
• Խորացնել երեխաների մոտ իրենց իսկ իրավունքների ու պարտականությունների վերաբերյալ գիտելիքները
  
• Ակտիվացնել աշակերտի` հասարակությանը պիտանի քաղաքացի լինելու զգացողությունը