ԲՆԱՊԱՀՊԱՆԱԿԱՆ ԽԱՂԱՂՈՒԹՅՈՒՆ. ԲԱՑ ԹՈՂԵՑԻՆ ՓՈՒՉԻԿԸ
09.17.2008
«panorama.am»
«Պահպանիր բնությունը» բնապահպանական քարոզարշավի շրջանակներում ՄԱԿ-ի գրասենյակի շենքի բակից երկինք բաց թողնվեց «Խաղաղություն հանուն բնության» 2 մետր տրամագիծ ունեցող հելիում գազով գազավորված փուչիկ: Այն օդ «ուղարկեցին» «ՎիվաՍելլ» ընկերության գլխավոր տնօրեն Ռալֆ Յիրիկյանն ու ՄԱԿ-ի Զարգացման ծրագրի հայաստանյան գրասենյակի մշտական ներկայացուցիչ Կոնսուելո Վիդալը: Ռ. Յիրիկյանի հավաստմամբ, «այս փուչիկը կդառնա «Պահպանիր բնությունը» կոչի փոխանցողը»:
«Այժմ, այս քարոզարշավի շրջանակներում ու հետագայում էլ ամեն ինչ արվում է, որպեսզի մենք ու մեր երեխաները կարողանանք ապրել մաքուր երկրում, մաքուր քաղաքում: Իսկ ապագայում, երբ մենք կունենանք մաքուր երկիր` հիվանդությունները քիչ կլինեն: Կկարողանանք կենտրոնանալ ու մտածել ուրիշ հարցերի մասին, որոնք ավելի կենցաղային ու ավելի կարևոր են»,- նկատեց Ռ. Յիրիկյանը:
Այսօրվա դրությամբ, ըստ նրա, քաղաքը մաքուր պահելու, բնությունը պահպանելու ուղղությամբ դաստիրակությունը հասարակության մեջ բացակայում է: Յիրիկյանը նշեց, որ ականատես է եղել այնպիսի դեպքերի, երբ մարդիկ մեքենաներից զանազան անպետք իրեր են դուրս գցել` շշեր, ծխախոտի դատարկ տուփ ու վառված ծխախոտ:
Անդրադառնալով երկինք բաց թողնված փուչիկին, Կ. Վիդալը շատ կարևորեց, որ հասարակույունը, հատկապես երեխաները հասկանում են, թե որքան մեծ է բնության պահպանության կարևորության հարցը ու թե որքան կարևոր է նրանց յուրաքանչյուրի ներդրումն այդ հարցում:
Նշենք, որ «Խաղաղություն հանուն բնության» փուչիկին կցված էր «Խաղաղության կոնդակ»` գրված հայերեն, թուքերեն, պարսկերեն, վրացերեն, ադրբեջաներեն, ռուսերեն և անգլերեն լեզուներով: Ըստ հեղինակների, սա ապացուցում է, թե բնության համար սահմաններ չկան:
Վերադառնալ
